«Кредит-Стандарт» Банкининг кредит рейтинги тасдиқланган
29 сентября 2011
«Ahbor-Reyting» рейтинг агентлиги «Кредит-Стандарт» Банкининг (КСБ) 2011 йил II чорагининг якунлари бўйича кредит рейтингини «uzA» даражасида тасдиқлади (прогноз – «Барқарор»). Миллий шкала бўйича «uzA» рейтинги КСБ кредит лаёқатининг юқори даражасини акс эттиради. Банк ўз молиявий мажбуриятларини ўз вақтида ва тўлиқ ҳажмида бажаришнинг юқори қобилиятига эга.Таҳлилчиларнинг фикрларига қараганда, 2011 йилнинг II чорагида КСБ нинг асосий молиявий кўрсаткичлари ижобий динамикани намоён этмоқда. Масалан, кредит портфелининг ҳажми ўтган йилнинг шунга ўхшаш даврига нисбатан 9,3% га ошди, ва 2011 йил II чорагининг якунлари бўйича 40,7 млрд. сўмни ташкил этди. Қаралаётган даврнинг якунларида муддати ўтган кредитлар мавжуд эмас. Банкнинг инвестиция портфели 2010 йилнинг II чорагига қараганда 41,7% га ўсди, ва 2011 йил II чорагининг якунлари бўйича 18,3 млрд. сўмга тенг бўлди.
Банк балансининг ликвидлик позицияси Рейтинг Агентлиги томонидан юқори деб баҳоланади. КСБ капиталининг адекватлиги кўрсаткичлари юксак даражада тутиб турилмоқда. «Ahbor-Reyting» нинг таҳлилчилари яқин келажак истиқболда банк фойдалилигининг кўрсаткичлари мақбул даражада сақланиб қолади, деб ўйламоқда.
«Ahbor Reyting» рейтинг агентлигининг расмий ҳисоботида айтилишича, “Кредит-Стандарт” банки республиканинг тез ривожланаётган банкларидан бири бўлиб, банк соҳасида етарлича рақобатбардош ўрин тутмоқда. Бунда банк иқтисодиётнинг устувор соҳаларидаги лойиҳаларни молиялаштириш ҳамда халқаро молиявий институтлар ва етакчи банкларнинг кредит линияларига хизмат кўрсатиш йўли билан республикада амалга оширилаётган иқтисодий ислоҳотларни фаол қўллаб-қувватлайди.
Маълумот:
«Кредит-Стандарт» ОАТБ 2003 йил 16 август куни, 1,3 млрд. сўмлик устав капитали билан тузилган. «Кредит-Стандарт» Банкининг Бош Офиси Тошкент шаҳрида жойлашган. 2011 йил 1 сентябрь ҳолатига кўра Банк активлари 204,7 млрд. сўмни ташкил этди, Банкнинг капитали 45,9 млрд. сўмга тенг.
«Global Finance» журналининг версияси бўйича Банк 2008- 2011 йилларда «Ўзбекистоннинг энг яхши банки» унвонини олган. Ўз навбатида машҳур халқаро молиявий журнал Euromoney (Буюк Британия) банк иши, молия ва инвестициялар соҳасида етакчиларни «Энг яхши ютуқлар» (Awards for Excellence) учун ҳар йили мукофотлаш маросимида Банкка 2009 йилдаги фаолиятининг якунлари учун «Ўзбекистоннинг энг яхши банки - 2010» унвонини берган. Ҳар йили жаҳоннинг энг яхши банкларининг рейтингларини эълон қилувчи Британиядаги махсус журнал «The Banker» «Кредит-Стандарт» банкини «Ўзбекистоннинг энг яхши банки –2006» деб тан олган.
